Artikels

Wie is ons?

Ensō Akademie in Wonderboom, Pretoria, is meer as net ‘n nuwe skool – dit is ‘n nuwe manier van dink oor onderwys. In hierdie onderhoud gesels ons met Lerina, die skool se hoof, oor haar agtergrond, haar visie vir die skool, en wat die MOS-leerstelsel werklik beteken vir leerders en ouers.

Lerina se agtergrond
Lerina het grootgeword in die noorde van Pretoria – dieselfde omgewing waar Ensō Akademie vandag staan. Na haar onderwysgraad het sy jare lank musiek onderrig, van individuele lesse tot vakmusiek. Sang is haar eerste instrument, kitaar haar tweede. Noudat sy hoof is, beskou sy hierdie nuwe fase as haar grootste avontuur.

Die lekkerste oomblikke tot dusver
Die skool se opening op 16 Februarie was ‘n hoogtepunt. Die ondersteuning van die omgewing, MOS en die ouers was bemoedigend. Maar die klein oomblikke tel ook – soos die kind wat ‘n besigheidsidee vir die klas aanbied, of leerders wat eenvoudig geniet om te leer.

Hoe werk die MOS-leerstelsel?
Die MOS-stelsel is volledig leerder-gesentreerd. Vakkundiges laai inhoud aanlyn op. Leerders werk teen hulle eie pas deur sogenaamde “slim blokke” – digitale opdragte wat ingestuur word as ‘n stemnota, video, skermgreep of geskandeerde werk. Binne 48 uur ontvang die leerder terugvoer:

Kleur – Betekenis

🟣 Pers – Opdrag ingestuur
🟢 Groen – Reg – gaan voort na die volgende borrel
🟠 Oranje – Meer aandag nodig by hierdie punt

Leerders het weeklikse doelwitte, maar kies self in watter volgorde hulle werk. Sleg geslaap? Moenie wiskunde vandag aanpak nie – fokus op kuns of tale, en pak wiskunde môre aan.

Wat maak Ensō Akademie uniek?
Drie kernwaardes rig alles wat hulle doen: Droom Groot • Dink Anders • Bou Saam
Op die perseel is daar ook:
– ‘n Volslae musieksentrum met alle instrumente
– Saamspeel elke Donderdag – leerders is deel van hul eie band
– Drama, tafeltennis, tennis en bokslesse

Lerina se visie oor 10 jaar
Sy sien ‘n tweede gebou, ‘n volwaardige hoërskool, trots Afrikaans in die noorde van Pretoria. Maar meer as getalle: “Elke leerder wat hier uitstap, moet weet wat hulle plek is. Hulle moet weet hulle het ‘n toekoms, en hulle gaan voorbereid wees vir dit wat gaan wees.”

Wat sê die ouers?
Een ouer het vertel hoe haar kind – wat nooit voorheen voor mense sou staan het nie – by die skoolopening die skoollied saam met die ander kinders gesing het. “Sy voel sy hoort hier,” sê Lerina.

Inskrywings
Inskrywings is oop die hele jaar deur. Besoek ensoakademie.co.za en klik op “Skryf in – 60 sekondes”.