Op 14 Januarie 2026 het ENSŌ Akademie vir die heel eerste keer sy deure oopgemaak. ‘n Nuwe Afrikaanse hoërskool in Pretoria, gebore uit ‘n droom om ‘n plek te skep waar jongmense nie net akademies kan groei nie, maar ook kan ontdek wie hulle is, waar hulle behoort en hoe hulle kan bydra.
Ons het met groot drome, baie opgewondenheid en ‘n hele klomp onbekendes begin. Want wanneer jy iets nuuts bou, weet jy nie altyd presies hoe die pad vorentoe gaan lyk nie.
Maar ons het geweet waarom ons dit doen.
Ons wou ‘n skool bou waar elke leerder raakgesien word. Waar groei belangriker as perfeksie is. Waar daar ruimte is om te dink, te skep, vrae te vra, foute te maak en weer te probeer.
En toe begin ons jaar van eerstes!
Die eerste keer wat ons deure oopgaan
Op 14 Januarie het ons eerste leerders ingestap en ENSŌ het van ‘n droom in ‘n lewende skool verander.
Op 16 Februarie het ons ons amptelike opening gevier. Dit was ‘n besondere oomblik waarin ons nie net die opening van ‘n nuwe skool gevier het nie, maar ook die begin van alles wat nog moontlik kan word.
En reeds in Maart het ons saal vir die eerste keer lewe gekry met Concert 4 a Cause (C4C). Musiek, mense en ‘n gedeelde liefde vir die kunste het ons ruimte gevul en ons herinner dat ‘n skool soveel meer as net klaskamers is.
Die eerste keer wat ons die deure vir ander oopmaak
Op 13 Mei het ons ons eerste Ope Dag aangebied.
Dit was ‘n geleentheid om ons droom met ander gesinne te deel, te wys hoe ons leeromgewing werk en te gesels oor wat moontlik is wanneer ons anders oor onderwys begin dink.
Op 6 Junie het ons eerste ENSŌ Harmonie plaasgevind – ‘n viering van musiek, konneksie en saamwees.
Want by ENSŌ glo ons dat gemeenskap nie net gebou word wanneer mense saam werk nie, maar ook wanneer hulle saam lag, sing en mooi herinneringe maak.
Die eerste keer wat ons saam vier
Op 8 Augustus het ons ons eerste Vrouedagbederf aangebied – ‘n geleentheid om die besondere vroue in ons gemeenskap te vier en sommer net ‘n bietjie liefde en waardering te deel.
Op 3 September het ons eerste Lente Talente plaasgevind.
Wat ‘n voorreg om te sien hoe ons leerders en ENSŌ-gemeenskap hul talente deel! Dit was ook die eerste optrede van ons ENSŌ-band – nog ‘n besondere eerste om by ons verhaal te voeg.
En toe kom 12 September.
Ons heel eerste Ubuntu Uitdaging!
‘n Dag waarop sport, kreatiwiteit, spanwerk en gemeenskap bymekaargekom het. Spanne het saam gespeel, uitdagings aangepak, gelag en mekaar aangemoedig.
Maar die Ubuntu Uitdaging was van die begin af oor meer as net wen.
Dit was ‘n geleentheid om mense bymekaar te bring, verhoudings te bou en saam iets groter as onsself te skep.
Bou saam. Speel saam. Groei saam.
Ons hoop dat hierdie eerste Ubuntu Uitdaging die begin van ‘n tradisie sal wees wat saam met ENSŌ en ons gemeenskap aanhou groei. Lees meer oor die eerste Ubuntu Uitdaging.
Die eerste keer wat ons terugkyk en sê: Kyk hoe ver het ons gekom!
Op 12 Oktober het ons ons heel eerste Erkenningsaand aangebied.
‘n Aand waarop ons nie net akademiese prestasies, sport- en kultuurprestasies gevier het nie, maar ook deursettingsvermoë, harde werk, persoonlike groei en die besondere bydraes van ons leerders.
Want by ENSŌ glo ons dat sukses nie net gemeet word aan waar jy eindig nie, maar ook aan hoe ver jy gekom het.
Ons tema vir die aand was daarom besonder gepas:
Groei bo Perfeksie.
En terwyl ons na ons leerders gekyk het, kon ons nie anders as om ook aan ENSŌ self te dink nie.
Want ons skool is óók nog besig om te groei, te leer en te ontdek.
‘n Jaar van eerstes. ‘n Verhaal wat nog net begin.
Wanneer ons terugkyk op 2026, sien ons natuurlik al hierdie besondere geleenthede.
Maar ons sien ook soveel meer.
Ons sien die eerste vriendskappe wat gevorm is. Die eerste keer wat iemand die moed gehad het om iets nuuts te probeer. Die eerste gesprekke, die eerste uitdagings, die eerste foute waaruit ons geleer het en die eerste oomblikke waarin ons besef het:
Hier is iets besonders besig om te groei.
Ons is ongelooflik dankbaar vir elke leerder, ouer, personeellid, ondersteuner en gemeenskapslid wat deel van ons eerste jaar geword het.
Julle het nie net ENSŌ se eerste jaar meegemaak nie.
Julle het gehelp om dit te bou.
En dit is dalk die mooiste van 2026.
Ons het nie net ‘n skool begin nie.
Ons het begin om ‘n plek te bou waar mense kan behoort, waar drome ruimte kry en waar elkeen se verhaal saak maak.
Ons weet nie presies wat die volgende hoofstuk gaan bring nie.
Maar ons weet ons wil dit saam skryf.
2026 was ons jaar van eerstes. Mag dit die eerste van baie besondere jare wees!
ENSŌ Akademie – Volmaak in ons onvoltooidheid.
